डा गोविन्द के सी ले हिजोदेखि शुरु गर्नुभएको आमरण अनशनबारे केही भ्रम फैलाउने प्रयास गरिएकाले तिनबारे केही स्पष्टीकरण दिनु आवश्यक हुन गएको छ ।
भ्रम 1: यो आन्दोलन व्यक्ति विशेषका विरुद्ध अर्को व्यक्ति विशेषको पक्षमा हो ।
यथार्थः पहिलेका दुई अनशनदेखि अहिलेसम्म आउँदा खास व्यक्तिको विरोध वा वकालत गर्ने डा के सीको मान्यता छैन । तर संस्थामा परस्पर विपरित छवि बोकेका मानिसहरु त्यति नै फरक एजेण्डा र कार्य सुची बोकेर देखिने गरी आएकाले डा के सी का मागमा व्यक्तिको नामै किटिएको अवस्थामा पनि त्यो खास प्रवृत्तिका प्रतिनिधिहरुको विरोध वा समर्थन हो ।
भ्रम 2. चिकित्सक शिक्षक संघ, प्रध्यापक संघ, आदिको विगतमा झैं समर्थन नभएकाले यो आन्दोलन सफल हुँदैन ।
यथार्थः पहिलेदेखि नै डा के सीले कुनै व्यक्ति वा संगठन विशेषको स्वार्थका लागि आन्दोलन नगरेकाले जहिले पनि उहाँ अघि अघि लाग्ने र पेशागत र नैतिक धर्मले अरु सबैले उहाँलाई समर्थन र सहयोग गर्ने अवस्था हो । विगतमा भन्दा यसपालि सहयोगको अवस्था फरक रहला वा नरहला त्यो भन्न सकिंदैन । तर त्यसले डा के सीको आन्दोलन र एजेण्डालाई कुनै तात्विक अन्तर पर्ने देखिंदैन ।
भ्रम 3. डा के सीलाई व्यक्ति वा समुह विशेषले आफ्नो स्वार्थ पुर्तिका लागि उचालेका हुन् ।
यथार्थः डा के सीले यसो गरिदिए वा नगरिदिए हुन्थ्यो भनेर कामना गर्न मानिसहरुलाई छुट छ । तर उहाँले आफ्नो ज्यानलाई नै जोखिममा राखेर गरेको आन्दोलन विशुद्ध एजेण्डा केन्द्रित छ । उहाँले चिकित्सा क्षेत्रका सधर्मी साथीहरुबाट सहयोग र ऐक्यबद्धताको अपेक्षा गर्नु स्वभाविक हो । त्यसलाई उहाँले कसैको निजी स्वार्थका लागि आन्दोलन गरेको भन्नु सरासर झुटो हो ।
भ्रम 4. तीनै शीर्ष दलको आशीर्वादले आएकाले शशि शर्माको डिन पदका लागि योग्यतामा प्रश्न उठाउन मिल्दैन ।
यथार्थः यहाँ मुद्दा शशि शर्मालाई को कसले समर्थन गरेर ल्याए भन्दा पनि उहाँको के कति योग्यताले वरिष्ठता मिचेर र विवादास्पद छविकै बीच पनि उहाँलाई ल्याइयो भन्ने प्रश्न महत्वपुर्ण छ । जहाँसम्म तीन दलको आशीर्वादको कुरा छ, सबै दलहरु मिलेर अन्तिम अवस्थासम्म सिनो लुछेझैं नलुछेका भए तत्कालीन साझा यातायात ३०० बसबाट अहिलेको १६ बसमा झर्ने थिएन । सबै दलले पालैपालो नलुटेको भए अहिले आयल निगम मासिक अरबौं घाटामा जाने थिएन र विद्युत् पाधिकरण १२ घण्टा लोड शेडिङ गर्न अभिशप्त हुने थिएन । एक जनाले गरे त्यही काम अपराध हुने तर ५० जना मिलेर गरेचाहिं त्यो एउटा अभ्यास मात्र हुने हाम्रो गलत मान्यताकै कारणले आज सरकारी सेवाप्रदायक संस्थाहरु त मरणासन्न हुने अवस्थामा छन् नै, निजी सेवा प्रदायक संस्थाहरुमा पनि मनपरीतन्त्र हावी छ ।
भ्रम 5. डा के सीको मुद्दा खाली त्रि वि शिक्षण अस्पतालको भविष्यसित मात्र जोडिएको छ ।
यथार्थः त्रि वि अन्तर्गतको चिकित्स शास्त्र अध्ययन संस्थान स्वास्थ्य सेवा र चिकित्सा शिक्षाको क्षेत्रमा देशकै अग्रणी संस्था हो । यो संस्थामा दलको टीका लगाएर पदाधिकारी आउनु र तिनले चुल्ठेमुन्द्रेहरुको सहयोगले संस्थालाई कार्यकर्ता भर्ती र भ्रष्टाचारको केन्द्र बनाउनु भनेको अहिलेको पुस्ताको मात्र नभएर भावी पुस्ताको स्वास्थ्यलाई समेत जोखिममा पार्नु हो । त्यसैले यो मुद्धा समग्र नेपालीहरुको योग्य चिकित्सकहरुबाट स्तरीय स्वास्थ्य सेवा पाउनुपर्ने अधिकारको मुद्दा हो ।
No comments:
Post a Comment